Bien, je l´ay dit, je le confesse,
Que nul ne te pourroit aimer
Autant  que je t´aime, Maistresse,
Sçachant mieux qu´autre t´estimer :
Car  d´autant que je cognoy plus

Et tes beautez et tes vertus,
D´autant  ma Francine je doy
Mettre plus grande amour en toy.

Un autre  moins digne, peut estre,
Du premier coup s´éblouira,
Et ne te  pouvant pas conoistre
Un fol amour en souffrira,
Pour un rayon  de ta beauté
Perdant de raison la clarté,
Et par trop vaine  passion
T´offrira son affection.

Mais dy : quel service  agreable
D´un tel fol pourras tu tirer,
Qui te criant non  pitoyable
Ne fera rien que souspirer,
Que t´ennuier de ses ennuis

Qu´il  prendra les jours et les nuits,
Pour ton amour, comme il crira,
Mais  par sottise il languira.

Non ainsi, non ainsi, Francine,
Je  ne t´aime ainsi folement,
D´un ray de ta valeur divine
Souffrant  un fol aveuglement.
Ce qui me fait ainsi t´aimer
C´est que je  sçay bien t´estimer,
C´est que sage je cognoy bien
Tes graces  qui me rendent tien :

Qui mourroyent, las, si de mes graces
Elles  n´avoyent les belles fleurs,
Que mignardement tu embrasses
Pour  orner tes dines valeurs
De leur chapelet fleurissant

Par l´age  ne se fanissant,
Que je leur donray bien apris,
Puis que tu ne  l´as en mépris.

Et ce qui me donne courage,
C´est que tu  cheris mes chansons,
Les aimant d´un jugement sage,
Bien que  j´agence leurs façons,
N´étant d´amour au coeur ateint,
En  l´honneur d´un nom que j´ay feint.
Combien donc les cheriras tu
Quand  je chanteray ta vertu ?

Tu les entans, tu les caresses,
Et  puis que tu les aimes tant
De leurs mignardes gentillesses
Ton  desir je feray contant.
Francine, si tu prens à gré

Mon chant  tout à toy consacré,
Si je te voy te plaire aux sons
De mes  amoureuses chansons,

Je feray que nulle ancienne
Ne  s´élevera dessur toy :
Je feray que la gloire tienne,
Pour  t´avoir obligé ma foy,
Bien peu d´envie portera
A la plus brave  qu´on lira
De nostre temps avoir eu l´heur
De gagner d´un Poëte  le coeur.