Francine a si bonne grace,
Elle a si belle la face,
Elle a les  sourcis tant beaux,
Et dessous, deux beaux flambeaux,
De qui la  clarté seréne

Tout heur ou m´oste ou m´améne.
La belle n´a rien de  fiel,
Elle est tout sucre et tout miel,
Et l´aleine qu´elle tire
Rien  que parfuns ne respire.
Son baiser delicieux
C´est un vray nectar  des dieux :
Elle est tant propre et tant nette,
Elle est en tout  si parfette,
Elle devise tant bien,
Elle ne se coupe en rien.
Ce  n´est qu´amours et blandices,
Mignardises et delices :
Elle sçait  pour m´enchanter
Si doucettement chanter,
Atrempant sa voix  divine,
Les baisers de ma Meline
Et tout cela que Ronsard

A  chanté de plus mignard.
Elle sçait les mignardises
Qu´elle a de  nouvel aprises
De Tahureau tendrelét
Plus que vous mignardelét.
Elle  sçait ces mignardises,
El´les a par coeur aprises,
Du chant en  ravist les cieux,
Et, je croy, les feroit mieux.
Il n´est  histoire ancienne
Dont elle ne se souvienne :
En amours il n´y a  rien
Qu´elle ne sçache fort bien.
Nul ne fait plus d´estime
De  quelque excellante rime,
Nulle ne voit mieux un vers
Quand il  cloche de travers.
Qui choisiroit une amie

De graces mieux  acomplie,
Quand si heureux il seroit
Qu´elle le contraimeroit ?
Toutefois  tousjours Peruse
Envers moy tousjours l´acuse,
Et m´engarder il  voudroit
D´aimer en si bon endroit.
Quoy ? S´il me vouloit  reprendre,
Quoy ? S´il me vouloit deffendre,
(Mais en vain)  d´aimer mes yeux,
Ou chose que j´aime mieux ?