Iḍaq rruḥ
Iḍaq rruḥ
Ya leḥbab tikkelt-a yid-wen dayen
Ssem yeḍleq di leǧruḥ
A ttkawen yifadden

Ay ddunit ur yi-tcuḥ
Tseqqa-d s lemḥayen
Akken ara iruḥ d amecṭuḥ
Win ukud tettqessirem

Iẓri-w yeɣleb leḥmali
Ul ixaq dima yeḥzem
Ddunit teqqel-iyi d ilili
Yegguma ad yekfu usawen

Ssemsawiɣ gerrzeɣ lbur
Cebbḥeɣ-t ifeǧǧeǧ d urqim
Ḥeḍreɣ mi n-fflen leɛrur
Ceṭṭben ula d ttlaqim
Yenquqel ujgagal n nnur
Tenfufed tmes deg walim
Icebbeḥ-d waṭṭan s ẓẓur

Yeṭṭef tasga deg wul yeqqim

Nudaɣ anwa ara sḍelmeɣ
Ay d-muggreɣ d iman-iw
Terra-yi tmara ad bibbeɣ
Azembil n ddunit-iw
Waqila qrib ad as-ḍelqeɣ
Ad steɛfun leǧwareḥ-iw
Ur zhiɣ ur nnecraḥeɣ
Ssfina n lḥif d axxam-iw

zdat-s hudden leḥyuḍ
Yeṭṭfen lbaḍna n wul-iw
Aḍar iruḥ deg wucuḍ
Tilleɣleɣt tewweḍ idmarren-iw
La nexxreɣ-kem la tzehhuḍ
Ur d-tecligeḍ deg lḥif-iw
Waqila gezmen lexyuḍ

Deg umurej yexnunes zzwaj-iw

Anda i tella tnumi
Tettwaɛfes temḥa dayen
Anda yella ubeḥri n tayri
I aɣ-yezzuzunen ulawen
Ass-a kul wa amek i as-yuki
I tɛeǧǧaǧt i d-yesɣernen
Timlella zḍant-iyi
Kem tufiḍ wid iyi-yifen