Tuɣaleḍ-iyi-d am yiṭij
Fell-i yettfeǧǧiǧ, tegnaw m´ a tt-yeǧǧ usigna
Isem-im ɣur-i ur yeffir irekkeb-iyi lḥir
M´ a kem-id-addreɣ deg isefra.

Tuɣaleḍ-iyi-d am udfel deg yiḍ m´ ara idel
Iberdan di mkul tama.
Fell-am i xlant leḥwari mmuten irkelli,
Ilaq ad d-tnadiḍ tura.

Tuɣaleḍ-iyi-d am ddheb ul mi kem-iqelleb
S yis-m ara yaf lehna.
Tifeḍ aggur ttziri, a nteddu ḥafi,
Tessɛerqeḍ-aɣ lǧerra.

Tuɣaleḍ-iyi-d am ddkir ijebbed-iyi lḥir,
Ttekkseḍ i umeḥbus lefqa,
Tleḥḥuḍ ɣef kul tamurt tettakeḍ-as lqut
I ugujil ur nesɛ´ ara.
Tuɣaleḍ-iyi-d d targit, walaɣ ddunit
D wayen fi nettnaɣ tura.
Wi mmuten wayeḍ ad d-yekker,

Tafat ad d-teḍher,
I ṭṭlam ad tekkes nnuba!

Tuɣaleḍ-iyi-d d abruri yekkaten fell-i
Am terṣast deg uglim terṣa,

Tuɣaleḍ-iyi-d am aḍu ara iɣummen agu,
Tafukt ad tḍil ɣer lḥara.
Isem-im, isem-im ass-a a t-id-nini,
Yid-s ad nili ad nḥareb ɣef tirrugza,
Ad neḍleb a ɣ-trefqeḍ, yid-neɣ ad tḥeḍreḍ,
Azul yis-m a Tilelli!