Bele Doette as fenestres se siet,
Lit en un livre, mais au cuer ne l´en tient ;
De son ami Doon li ressovient,
Qu´en autres terres est alez tornoier.
E or en ai dol!

Un escuiers az degrez de la sale
Est dessenduz, s´est destrossé sa male.
Bele Doette les degrez en avale,
Ne cuide pas oïr novele male.
E or en ai dol!

Bele Doette tantost li demanda:
" Ou est mes sires que ne vi tel pieça? "
Cil ot tel duel que de pitié plora.
Bele Doette maintenant se pasma.
E or en ai dol!

Bele Doette s´est en estant drecie,
Voit l´escuier, vers lui s´est adrecie ;
En son cuer est dolante et correcie
Por son seignor dont ele ne voit mie.
E or en ai dol!

Bele Doette li prist a demander :
" -Ou est mes sires cui je doi tant amer?
-En nom Deu, dame nel vos quier mais celer :
Morz est mes sires, ocis fu au joster. "
E or en ai dol!

Bele Doette a pris son duel a faire:
" Tant mar i fustes, cuens Do, frans debonaire.
Por vostre amor vestirai je la haire,
Ne sor mon cors n´avra pelice vaire. "
E or en ai dol!
Por vos devenrai nonne en l´eglise saint Pol.

" Por vos ferai une abbaie tele
Qant iert li jors que la feste iert nomeie,
Se nus i vient qui ait s´amor fauseie,
Ja del mostier ne savera l´entreie.

E or en ai dol!
Por vos devenrai nonne a l´eglise saint Pol.

Bele Doette prist s´abaie a faire,
Qui moult est grande et adès sera maire :
Toz cels et celes vodra dedanz atraitre
Qui por amor sevent peine et mal traire.
E or en ai dol!
Por vos devenrai nonne a l´eglise saint Pol.